Ólöf Inger Kjartansdóttir gaf nýverið út ljóðabókina Silhouettes – memories of a past life undir höfundarnafninu Kama Poriot. Hún kom við á skrifstofunni í gær og afhenti okkur nokkur eintök, en Kristniboðssambandið styrkti útgáfu bókarinnar.
Ólöf Inger ólst upp sem barn kristniboða á vegum SÍK í Keníu, á Íslandi og í Kaliforníu og býr nú í Danmörku.
„Skrif eru leið til að skilja hið undarlega í lífinu og gefa reynslunni merkingu. Þau gera manni kleift að taka það sem maður hefur upplifað, hvort sem það er gott eða slæmt, og breyta því í eitthvað fallegt. Vonandi finnur lesandinn þess merki í þessari bók.“
Aftan á kápu bókarinnar segir:
Áföll geta verið margvísleg og birst í ýmsum myndum. Stundum áttar maður sig ekki á því að um áfall var að ræða fyrr en löngu síðar, þegar eitthvað gerist sem knýr mann til að horfast í augu við það. Hvað gerist þegar maður upplifir eitthvað sem umbyltir allri sjálfsmynd manns? Að alast upp sem barn kristniboða fól oft í sér að vera skilinn eftir á meðan foreldrarnir héldu út í heim, knúin áfram af köllun. Spurningar um hvort það hafi verið rétt komu ekki fyrr en síðar. Miklu síðar.
Bókina er hægt að panta hjá útgefandanum Pegasus Publishers og á Amazon.
Nýútkomin bók
