Starf SÍK í Japan

Á aðalfundi Kristniboðssamba13ndsins árið 2010 var ákveðið að hefja kristniboðsstarf í Japan. Japanska þjóðin er önnur stærsta þjóðin sem hefur hvað fæsta fylgjendur kristinnar trúar í heiminum (1,2 % kristnir, þar af 0,3 % mótmælendur). Þjóðin telur rúmlega 127 miljónir manna. Trúfrelsi er tryggt í stjórnarskrá landsins. Á yfirborðinu virðist Japan mjög vestrænt og veraldlegt samfélag þar sem yfir 80% landsmanna eru ekki skráðir í ákveðið trúfélag. Flestir Japanir aðhyllast þó einhverskonar forfeðradýrkun eða shintoisma.

Kristniboð í Japan er mjög frábrugðið kristniboði í Afríku. Japan er mjög þróað land með þriðja stærsta hagkerfi í heimi á eftir Bandaríkjunum og Kína. Flestir íbúar landsins búa í borgum eða 92%. Kristniboðar frá Noregi, Finnlandi og Íslandi vinna náið með Lútersku kirkjunni (WJELC). Kristniboðar frá ýmsum löndum hafa í gegnum árin unnið ötullega að kristniboði í Japan en árangurinn hefur ekki verið mikill. Í dag starfa um 1200 kristniboðar frá ýmsum löndum í Japan.

Katsuko og Leifur Sigurðsson eru fyrstu íslensku kristniboðar Kristniboðssambandsins í Japan. Þau bjuggu fyrstu tvö árin í Kobe þar sem Leifur lagði stund á nám í japönsku. Árið 2012 fluttu þau til Fukuyama. Leifur starfaði þar sem prestur safnaðarins til að byrja með. Það var mjög krefjandi starf og lítill tími í boðunarstarf. Nýútskrifaður prestur, Satoru Fukuda, tók við prestsstarfinu árið 2013. Þau fara aftur til Japans sumarið 2015 eftir eins árs dvöl á Íslandi og verða í samstarfi við söfnuð á Rokko island í Kobe.

Kristniboðssambandið hefur alla tíð starfað í náinni samvinnu við Norska kristniboðssambandið (NLM) og gerir það einnig í Japan. NLM hóf starf í Japan árið 1949 eftir að lokað var fyrir kristniboð í Kína. Árið 1962 var Lúterska kirkjan stofnuð (West Japan Evangelical Luthern Church, WJELC). Norskir kristniboðar starfa enn í Japan en þeim hefur fækkað mikið hin síðari ár.